【中古車】想懷舊搵架大發Copen 原來都唔係咁易

汽車當然係一件工具，但有時又係一件大玩具，尤其係一啲所謂玩樂型車款，你買佢嗰陣千祈唔好諗實用性，要分嘅話，有錢嘅，一架實用一架玩樂；冇錢嘅，咁就一架五門Golf GTI搞掂。所以，當每次上網見到人講啲兩座位玩樂車，有人走出嚟話「呢啲車好唔實用，尾箱連一個喼都擺唔入」，真係想叫佢早啲去抖啦，玩車嘅世界唔啱你。

當你真係一架實用一架玩樂，但養兩架車點都係吃力嘅。所以Second Car可能要揀啲Budget Buy，咁平平地兩座位又有乜選擇？通常一講呢啲就會諗起MX-5，但係而家要買架靚仔嘅MX-5 談何容易，即使係廿年車齡嘅第一代，叫價都高到黐晒線，仲要年份手數咪數「三高」，十架有九架都車身生鏽，所以都係算吧啦。

其實另一間日本車廠大發（Daihatsu）都曾經出過一款膾炙人口嘅K-Car開篷車仔，就係Copen，前期型用660c.c. Turbo引擎，係根正苗紅嘅K-Car血統，04年推出初期，當時都仲食正K-Car熱潮，但係Copen就係因為「唔實用」，所以係比較冷門嘅選擇。其實當年啲人買K-Car，一來係因為日本興，二來就貪平。Copen就純粹玩樂型，得兩個位，個電摺硬頂摺埋之後，車尾箱真係好細，不過講玩，佢就真係非常過癮，首先660c.c. Turbo引擎嘅改裝潛力非常龐大，而且改裝嘅效果相當明顯，最基本係裝隻冬菇、換個放氣哇佬、改埋套死氣喉，出力已經完全唔同曬。

Copen設計特別，應該會係K-Car中嘅未來經典。

細細 架兩座位，擺明係玩具車。

所以呢，而家你話要換架全原裝嘅二手Copen，其實係少之又少，甚至可能冇。因為玩呢啲車點都會改少少嘢，始終係年輕人嘅玩物，一定要追求刺激，就算唔搞副引擎，車架同避震都一定會加強下。我勸你就無謂追求全完裝喇，反正當年嘅大發仔比較單薄，如果只係強化下車架，收貨啦。

以現今標準嚟睇，Copen除咗冇尾箱空間同埋比較自私得兩個位之外，車體太細喺馬路上都有一定危險性，揸MX-5都驚畀大貨車夾啦，何況一架比MX-5更細嘅Copen？另外就係車齡偏高，如果你買前期型（04年出廠）嘅車，個電摺頂同啲車廂組件都可能有大量雜聲，所以你要抵受得住呢啲噪音先好買；另外就係要留意個Turbo，日子有功可能都需要更換，維修項目都唔少㗎。

個電硬頂20秒開合，好快。

有幾實用？有眼你睇。

當年原裝車已跟Momo軚。

雖然話車齡高，但Copen嘅二手叫價都唔只一萬幾千，隨便上網search下，至少都六、七萬起錶，年份新啲或者Keep得靚啲嘅，可能叫到十萬八萬，值唔值得就見仁見智啦。其實同價已經可以買到第三代MX-5，同樣有電摺頂，不過唔多好揸，二手仲雪條過Copen；歐洲車嘅SLK或者Z4，可能會畀Copen仲平，但係如果你真係想搵日本K-Car開篷車仔，而你又鍾意佢個樣卡通樣，咁Copen就無可代替，係唯一一架正宗660c.c. Turbo嘅開篷K-Car。其實後期型Copen因為引擎過唔到歐、美廢排標準，廠方曾經換過副1300c.c.直四引擎，但係當時已經接近水尾，香港入貨非常少，所以如果你遇到1300c.c.嘅Copen，都可以考慮Keep番架。