呼籲做選民疑得罪內地網民 香港人集氣齊推周柏豪唱片登榜首

日前周柏豪盡公民責任，喺社交網站呼籲大家登記做選民，點知被內地網民誤解為支持港獨，紛紛喺柏豪IG同微博留言指責佢，仲封佢做「港獨豪」。而周柏豪亦有喺微博解釋：「中華人民共和國香港特別行政區政府呼籲市民行使選民登記的權利及義務，是愛護國家愛護香港的合法行為，應以正面態度對待，予以支持」，不過睇嚟已經得罪咗玻璃心嘅內地網民。原定柏豪喺本月13日到重慶出席音樂節，都被除名踢走。明明宣傳海報嘅演出名單有柏豪個名，但購票網站就冇左，柏豪同粉絲表示未能到重慶。

一班香港網民為集氣支持柏豪，出錢力撐佢，齊齊喺音樂平台購買佢嘅唱片或歌曲。喺尋日（7日），10隻最高銷量廣東唱片柏豪佔咗6隻，頭5位都係由柏豪包辦晒，包括2012年大碟《Imperfect Collection》及2014年EP《同行》等等。而歌曲方面，頭10位最高銷量廣東單曲柏豪同樣佔據咗6個位置，包括《傳聞》及《我的宣言》等等，柏豪亦喺社交平台答謝大家嘅支持。