Yahoo奇摩新聞 李鵬飛：做特首要有政治智慧，企喺香港人一邊
79歲的政壇元老、前行政立法兩局議員及前港區人大代表李鵬飛，已沒有公開論政一段時間。在這個躁動的6月，有些話，他不吐不快。
李鵬飛先由林鄭月娥這個人的性格特徵講起。
話說提拔李鵬飛的「大Sir」鍾士元99歲生日前夕（2016年），李鵬飛在一個節目訪問時任政務司司長林鄭月娥後，林鄭主動跟他提出，希望出席大Sir的99歲壽宴。李鵬飛之後通風報訊，「大Sir當時話：『我都未請過佢。』我話你叫秘書打去啦，結果那晚林鄭來了，坐在大Sir旁邊，一句聲都冇出，她是來看大Sir班朋友係邊個，你知大Sir政治地位好高。後來大Sir100歲生日時，她做了特首再來，嗰次就有起身講嘢。」
「大Sir去年底過身之後，林鄭冇再跟我聯絡。」
李鵬飛很早已留意到，林鄭有野心想選特首，就在她做政務司司長後期，李鵬飛觀察到她不再穿行政人員套裝，改穿旗袍，還有化妝。那次她主動說要來鍾士元99歲壽宴，可是正在拉筋想出閘？李鵬飛也說不上：「有一段時間，梁振英好似好大機會連位，或者林鄭當時真係官到無求膽自大，先主動話要來見大Sir同佢班朋友？我唔知。」
「我唔記得識咗林鄭幾耐，總之我在行政局時，未見過佢。」李鵬飛最叻收風，當然知道林鄭的為人作風。
「讀書時時考第一的人，以為自己樣樣掂。佢比較自負，認為自己係有料之人。她是一個非常有性格的公務員，對下屬要求十分嚴謹。佢真係好勤力，乜嘢文件放喺佢枱面都睇晒。」飛哥，你咁都知？「我梗係知啦，佢一日工作16小時，但唔係好信任人。」近日政圈流傳，在修訂《逃犯條例》的工作過程中，有官員、行會成員曾向林鄭指出問題，卻被她拍枱大駡或回敬一句：你係咪唔想做！
「搞成咁，係佢性格問題。」
「林鄭最大問題，係佢無政治智慧，唔係一個政治人物。佢係一個公務員，跟指示、收order做嘢。」
做特首，最緊要，係懂得做一隻政治動物。
李鵬飛記得，回歸前夕他出任自由黨主席時，曾撰寫一份治港建議書，開首談及香港特區行政長官的的政治地位，在中國官場的排名非常重要，「董建華做特首前，我哋已經叫佢去同江澤民講，就係行政長官要去到副總理級，有呢個地位，其他省長之類的就不會來指指點點。」
「如果特首有副總理地位，就唔會搞到今日咁，中聯辦話要行埋一齊，變成西環係市委書記，特首係市長。」今次修例風波，李鵬飛可有聽聞西環的幕後角色、西環可是其中一個始作俑者？「唔知。」
李鵬飛續話當年：「我仲記得，我叫董建華要好似港督咁，搵一個人做政治顧問同北京溝通。政治顧問好重要，因為特首唔得閒成日應酬北京，後來北京派了一個人來，小弟都認識的，但佢（董）唔要。點解？因為其他公務員反對。」
「問責制點解會出現，因為董建華和陳方安生等公務員不和，早年試過有位局長，連五星旗都唔肯掛，話驚無人來搵佢。董建華同大Sir講，話自己係Non Executive Chief Executive，好似上市公司非執董咁無權力，於是商量搞了問責制出來，但其實沒有基礎的，想搵自己友來取代公務員系統，結果變成拉雜成軍、互不相識、理念也不同。我曾經叫過董建華組織『董黨』，搵同自己理念一樣的人來組班，但可能北京怕中共以外的政黨執政，其實唔使怕。」
李鵬飛感嘆，回歸後特區政府的管治團隊，除了問責制局長拉雜成軍，行政會議成員也一樣。
曾獲港督尤德和衛奕信委任為行政局議員的李鵬飛記得：「港督開會前好少講嘢，在行政局會議也不發言，我未見過有港督在行政局講佢意見，佢只係聽。如果成員之間傾唔掂，港督就會話放埋一邊先，等我想想，之後再個別傾。」
「我記得衛奕信年代，有一次，公務員要求加人工15%，如果行政局通過的話商界要跟，會很吃力，於是我反對，最後還是9比6通過加薪。我行出去就要講俾商界聽點解政府要贊成，游說他們接受，即李鵬飛對外講係話支持政府加薪，唔係話自己點點點有保留，這就是集體負責制，one voice，決定之後無論你是否同意都要幫政府sell。而我亦唔可以講開會過程，連題目都唔可以講，這就是保密制。」
「但你睇吓今日班行政會議成員？日日 blah blah blah，今日講同明日講又唔同，我最激氣係見到咁。」
搞出個大頭佛，林鄭有責、局長有責、行政會議成員都有責。
李鵬飛續說：「講番林鄭，除了她的性格，最大問題係佢唔識政治。佢冇政治智慧，唔係因為佢蠢，而係因為她不是政治人物，其實民生、經濟都是政治問題，要用政治頭腦去處理。」
「你看她處理修例，用上台灣殺人案，係送禮俾蔡英文有彈藥，令北京震驚，就係無政治視野。」
「林鄭最差係唔搵民主派，只向建制派道歉，區分自己唔係政治中立的特首。她應該要做一個全香港人的特首。」
「林鄭用一種take order方法做事，有嘢唔敢同上頭講，但如果佢有政治智慧，就應該建立自己特殊地位。她既然是香港number one，任何事與中央有衝突，她作為領袖，雖然是中央委任，但應要企喺香港人這一邊。」
「林鄭最錯，就係冇企喺香港人一邊。任何問題，她都有資格搵韓正，可以話這是香港人問題，我要企香港人這邊。她一定要俾香港人知道，她為香港人出聲。你睇吓其他省委書記，都係為自己省的利益去拗，尤其香港好敏感，一國兩制非常重要，中央係想聽。」
做特首、做領袖，也要有廣闊胸襟聆聽意見。過去數月政府推修例，不同界別、團體已向政府響過多次警鐘，但林鄭無視反對聲音。李鵬飛有感：「她是住在象牙塔的人，不明白，也不想理。所以話，佢有份造成現在這個局面。」
「佢建立唔到香港人的信心、信任，她沒有政治家風範去辦政治事件，都說她是公務員心態。」李鵬飛指，不知道林鄭可否完成餘下3年任期，中央開始另覓人選也不出奇。
「林鄭今次的遭遇，告訴日後的特首：任何人做，一定要同中央講，當國內與香港利益有衝突時，要企喺香港人一邊，如果唔係，你唔好來搵我，因為無得做。中央唔俾的話，就講：炒我囉。」
林鄭，懂嗎？做香港特首，是要建立政治資本、要拿捏、要進退，還要有良心、要聽意見、要尊重香港人，唔係一味聽話就得。
李鵬飛最後想提出三點：
一：修例要撤回。「建制派既說暫緩和撤回沒分別，又話要聽民意，既然大多數人要撤回，點解又不順從民意。」李鵬飛說，暫緩和撤回有分別，「跟23條不同，23條因講明特區政府要自行立法，即使撤回都可以隨時再來。但今次引渡修例，佢可能覺得，撤回就好難再來。」
二，成立獨立調查委員會非常重要，香港歷史上，未試過一個星期兩次逾100萬人上街，中間更發生流血事件，這個是大歷史問題。「六七暴動都有獨立調查，為何今次不做？咁大件事，大家都唔想再發生，不做獨立調查完全站不住腳。」
三，林鄭出來道歉，說只有少數人涉暴力，但又不改暴動定性，這完全說不通。「所以，獨立調查十分重要。」
觀看原文： 按此連結
