【連大S都讚】《流星花園》台版新F4人選出爐

2001年台灣電視劇《流星花園》，將F4（言承旭、周渝民、朱孝天和吳建豪）捧紅，仲紅遍全亞洲。今年偶像劇教母柴智屏宣布開拍新版《流星花園》，大家對新F4選角都好期待。

劇組由6月開始走遍台北、香港、新加坡、洛杉磯及中國大陸一線城市嘅大學，從超過30,000份演員自薦簡歷去尋覓新F4。近日終於宣布新F4誕生，將由官鴻、王鶴棣、梁靖康、吳希澤演出，不過究竟四位分別飾演邊個角色就暫時未透露。

新F4位男主角平均年齡21歲、平均身高185公分，亦都係台、日、韓版《流星花園》(日本漫畫原著《花樣男子》)中，平均年齡最小（只有21歲）、平均身高最高嘅F4組合。

新F4四位成員來自唔同地方。官鴻（22歲）來自台北；王鶴棣（19歲）來自成都；梁靖康（23歲）來自廣州；吳希澤（21歲）來自深圳。

製作人柴智屏就話4位演員雖然唔係學做戲出身，但佢地個份青春無敵嘅氣質、活潑嘅個性深深打動到佢，就連上一代杉菜大S都讚「新F4條件真的很棒」。

咁邊個又會係新嘅「杉菜」呢？

左起： 王鶴棣 、 梁靖康 、 吳希澤及官鴻

左起：道明寺（言承旭）、 花澤類（周渝民） 、 董杉菜 （大S徐熙媛）、 美作（吳建豪）及西門（朱孝天）